ටැක්සි....... ටැක්සි.......

ම්ම්ම්ම්..........
ලංකාදීප පත්තරේ බලාගෙන ඉන්නකොට දැක්ක සිද්දියක් නිසා මතකුනා පොඩි කතාවක්.
ලංකාදීපෙ දෙයියෝ සාක්කි එකේ තිබ්බා මෑන් කෙනෙක් පොඩි අඩියක් එහෙම ගහල බස් එකක යනවලු.මෑන් බස් එකේන් බැහැල තියෙන්නෙ බහින තැන පහුවෙලා ලු.ඉතින් මිනිහත් එක්ක එතනින්ම බහැපු තව මෑන් කෙනෙක් පොඩි කෝල් එකක් ගන්ඩ කියල ෆෝන් එක ඉල්ලගෙන.මැන් නොම්මරයක් එහෙම ඔබල ෆෝන් එකත් කනේ තියාගෙන පොඩ්ඩක් ඉස්සරහට ගිහිල්ල , එකපරටම හුරේ රන් එකක් තියන්ඩ ගත්තලු.ඉතින් ෆෝන් එක අයිතිකාරය පොඩි අඩියක් එහෙම දාල හිටපුනිසා අර මෑන්ස්ව අල්ලගන්ඩ බැරිවෙලා.......

ඔය කතාව දැක්කම මට මේ කතාව මතක්වුනා........

මේ සිද්දිය සිද්දවෙල තියෙන්නෙ මගෙ යාලුවෙකුගෙ යාලුවෙකුට.ඒකනිසා නම් , ගම් , දන්නේ නැත.කතාව ඉහත කතාවට සමාන, නමුත් ඊට වඩා පරිප්පුවක් කාපු සීන් එකක්.

මේක සිද්දවුනේ මැදපෙරදිග රටකදි, ඒ කියන්නෙ එක්සත් අරාබි එමීර් වල ,ඩුබායි වල.අපේ කතානායක තුමා මේ රටට ගොඩබහැල ටිකක් කල් වෙනවලු."ලු" කියන්නෙ මේක මගෙ යාලුවෙකුගෙ යාලුවෙකුට උන නිසා..රයිට්...ඉතින් මිනිහ පාරතොට දැන ගත්තට රටතොටේ මිනිස්සු ගැන එච්චර දැනගෙන ඉදල නෑ.ඉතින් දවසක් හවස්වේගන එද්දි මිනිහට මොකක්හරි අවශ්‍යතාවකට පොඩිගමනක් යන්ඩ වෙලා.මිනිහගෙ වෙලාවද කාමරේ අනික් උන්ගෙ වලාවද දන්නෙ නෑ කවුරුවත් කාමරේ ඉඳල නෑ තනියට එක්ක යන්ඩ.

"මොකට බයවෙනවද..?පාරතොට දන්නවනම්.සෙනගත් සූසූ..........ගාල ඉන්න තැනකටනෙ යන්නෙ"

කියල හිතන්ඩ ඇති මිනිහ.(ඔන්න බලන්ඩ මිනිස්සු හිතන විදිය වරදින හැටි).කොහොම හරි ගමන ගිහිල්ල කරගන්ඩ ගිය කටයුත්තත් කරගෙන ඔන්න දැන් ආපහුත් එන්ඩ පටන් ගත්තලු.

ඉතින් මිනිහ මෙතනට ඇවිල්ල තියෙන්නෙ ටැක්සියක.මිනිහට බර ගානක් වියදම් වෙලා.දැන් යන්ඩත් ඒවගේම වියදම් වෙනව නේද කියල හිත හිත ,ඉතින් මොනව කරන්ඩද කියල ටැක්සියක් නතර කරගන්ඩ පොඩි ට්‍රයි එකක් දීගෙන ඉන්නවලු පාර අයිනට වෙලා.ඔහොම ටිකක් වෙලා ඉන්නකොට සුදුපාට කාර් එකක් නැවැත්තුවලු මිනිහ ලඟ.නවත්තල අහනවලු

"කොහාටද යන්නෙ" කියල.

බලපුවම තඩි කලු අප්‍රිකන්කරයෙක්ලු.මෙහෙ නීත්‍යානුකූල ටැක්සි වලට අමතරව හොර ටැක්සිත් දුවනව කියල මෙහෙ ඉන්න අයනම් දන්නවනෙ..? ඉතින් ඒවගෙ ගනන් හිලව් එහෙමත් අනික් ටැක්සි වල ගනන් හිලව් වලින් බාගයක් විතර තමයි වෙන්නෙ.මිනිහත් හිතුවලු එහෙම එකක් වෙන්ඩ ඇති මෙක කියල.මොනා උනත් මෙහෙ හොර ටැක්සි දුවන එකයි ඒවගෙ යන ඒකයි දෙකම නීතියටනම් පටහැනියි.කොහොමින් කොහොමින් හරි මිනිහ යන්ඩඕන තැන කිව්වම ,

"ආ...හරි හරි නගින්ඩ" කිව්වලු.

මේව සෙරම මේ ඉංගිරිසියෙන් කතාවෙච්ච..රයිට්.මමයි මෙ ට්‍රාන්ස්ලේට් කලේ.ඉතින් මිනිහ නගින්ඩ කලින්ම කිව්වලු

"මගේ ගාන මෙච්චරයි" කියල.

කියල තියෙන්නෙ හරි ගානෙන් භාගයයි."හරි හරි..නගින්ඩ" කිව්වලු.

ආ...දැන් අපේ කතානයක තුමත් ඉස්සරහින්ම නැගල ඉඳගෙන එනවලු.ඔහොම ටිකක් දුර එනකොට කල්ලත් මුත් එක්ක හොදට කතාවට වැටිල.දන්නවනෙ දන්න කට්ටිය කල්ලො කොහොමත් කතාවට දක්ශයොනෙ.ඔහොම තව දුර එනකොට කල්ල හොදටම ‍ෆිට්වෙලා අපෙ බුවත් එක්ක.

දැන් ඔන්න ටිකක් වාහන තදබදයක් තියන හරියකට දෙන්න සෙට්වෙලා.යන්ඩම බැරිලු ඉස්සරහට.දැන් කල්ලට හරි හදිස්සියලු.අපේ බුවාට මේක එවලෙ තේරිල නෑ.පස්සෙ කතන්දරේ ටිකක් දුරදිග යද්දි තමයි හිතිල තියෙන්නෙ මූ කලබලෙන් නේද හිටියෙ කියල.ඉතින් මිනිහ ට්‍රැ‍ෆික් එකට බනිනවලු , වාහන කරයින්ට බනිනවලු , පස්සබලනවලු එක වැඩයිලු.අන්තිමට බැරිමතැන මිනිහ වාහනේ අයිනකට කරල නවත්තල කෝල් එකක් ගන්ඩ ට්‍රයි කරනවලු.දෙතුන් පාරක් ට්‍රයි කරල අපේ ලොක්ක දිහාට හැරිල කියනවලු

"යාලුව මට කෝල් එකක් ගන්ඩ ෆෝන් එක පොඩ්ඩක් දෙනවද" කියල.

ලොක්කාතේ තිබිල තියෙන්නෙ දිරාම්(ඩුබයි සල්ලි)2000ක් විතර වටින ෆෝන් එකක්.ඒ කියන්නෙ රුපියල්නම් 60,000 කට ටිකක් වැඩි ෆෝන් එකක්.ඒක මිනිහ යාලුවෙකුටවත් දෙන්නෙ නැතිලු වැඩිය අතපත ගාන්ඩ මොකද එකක් ගනන් වැඩියි අනික අරව මේව වැඩ කෑලි ගොඩයි , කවුරුහරි සෙටිංස් වෙනස්කලොත් එහෙම.. ඉතින් ඔන්න අපේ මෑන් ඇඹරෙද්දි කල්ල කියනවලු

"හරි හරි මම තව10ක් අඩුකරන්නම් කියල"

අම්මට සිරිවේයි කිව්වලු බොලේ නිකංවගේලු ඒතකොට ගමන.මිනිහ පැනපුගමන් ෆෝන් එක දීල තව ඔපරේට් කරන විදියත් කියල දුන්නලු.මෑනුත් ඉතින් නොම්මර වගයක් ඔබල එහෙම කනේ තියාගෙන කාර් එක වටේ ඇවිදිනවලු .අපේපොරත් ඉතින් ඇස් දෙක පොරගෙ ඇගේ ඇනගෙන බලාගෙන ඉන්නවලු සෙටිංස් අල කරයි කියල.ඔන්න බොලේ අපේ පොර පොඩ්ඩක් එහෙ මෙහෙ බලනකන් ඉඳල කල්ල වාශ්පවෙලා.

හරි කොහෙ ගියත් ලොක්ක ආපහු එන්ඩ ඒපැයි වාහනේ ගන්ඩ.අපෙ පොර පොඩ්ඩක් ඔලුව දාල බලපුවාම යතුරත් යතුරු කටේම තියනවලු.ආ කොහොමත් අව්ලක් නෑනේකියල පොර ඉන්නව්ලු වහනේ ඇතුලටම වෙලා.විනාඩි 10ක්-15ක් ගියාලු.කල්ල එන පාටක් නැතිලු.අව්ලක් නෑ වාහනේ මගේ ගාවනේ කියල ගානක් නැතිව ඉන්නව්ලු , මොනව උනත් ගාන තව 10කින් බැස්සුවනෙ කියල හිතල.ඔන්න එකපාරටම හොද උස මහත දෙන්නෙක් ඇවිල්ල කාර් එකේ දොර ගාවම හිටගෙන වටපිට එහෙම බලල එකපාරම දොර ඇරල අපේ ලොක්කව එලියට ඇදල අර්ගෙන බිමදමාගෙන අත්දෙක පස්සට කරල දැම්මලු "මාන්චු".වැඩේට තප්පර 5ක්වත් ගිහින් නෑ.පොරට හිතන්ඩවත් වෙලාවක් තිබ්බෙ නෑලු.අපේ ලොක්ක එකපාරටම කෑගහල ඇහුවලු

"මොකද මේ, කව්ද උඹල , මොනවද කරන්නෙ...?"කියල.

ඔන්න එතකොට මූව කුනුමාලු කෑල්ලවගේ ඇදල අරගෙන කෙලින් කරල වාහනේටම හේත්තු කරල හැදුනුම් පතක් පෙන්නල කිව්වලු

"අපි සී.අයි.ඩී..කෝ තමුසෙගෙ යාලුව....? කියල.

"මොන යාලුවද...?"

කියල අහපුගමන් සට පට ...මූනට හත අටක් ඇනල එතකොටම ආපු වාහනේට දාගෙන ගිහිල්ල.කෙලින්ම පොලිස් කූඩුවෙ.

"වරද මොකක්ද...?"

මු දෙතුන් පාරක්ම අහල තියනව.අහන අහන පාරට දෙක තුනක් කන්ඩවෙනවලු.අන්තිමට අහන එක නවත්තල තවත් ගුටිකන්ඩ බැරිනිසා.මූට දැන් කල්පනවෙනාවලු,

"යකෝ ටැක්සියක ගියපලියට මෙහෙම ගුටිකන්ඩ වෙනවනම්, ටැක්සිය එලවන් ගියානම් කොහොම කන්ඩ වෙයිද" කියල.

ඒත් කෝ ටැක්සිය එලවන් ආපු කල්ල.අපෙ ඔල මොට්ටලයට තාම තේරෙන්නෙ නැතිලු.
ඔන්න රෑ 12.00ට විතර ලොක්කෙක් වගේ පොරක් ඇවිල්ල ගත්තලු මූව එලියට.තවත් කෑමක් තමයි කියල හිතල මුත්

"මොනව කරන්ඩද"

කියල හිතාගෙන එලියට ආවලු.ඔන්න ඒපාර අර අලුගෝසුවො ටික ඈතින් ඉන්නවලු.මෙන්න වැදගත් පිලිවෙලට මේසයක් ලඟ පු‍ටුවක එහෙම ඉන්දවල ප්‍රශ්න අහනවලු.

"කෝ යාලුව..?"
"මොන යාලුවද..?"
"කල්ල..?"
"එයා මගේ යාලුවෙක් නෙවෙයි"
"ඇත්ත කිව්වොත් උඹට තවත් රිද්දන්නෙ නැ, නැත්තම් දන්නවනෙ...?"
"මම ඇත්ත කියන්නෙ ,මගේ යාලුවෙක් නෙවෙයි"
"ඇත්ත් කියපන්........... , ............ , හු................පුතා , තොපි කොහෙන්ද කාර් එක හොරකම් කලේ...? "

කියල මේසෙට ගහල ගෝරනාඩුකලාලු අපේ එකා පු‍ටුවෙන් බිමලු.කොහොමද භය වීම.ඔක්කොටම වඩා හීන් දාඩිය දැම්මෙ අහපු ප්‍රශ්නෙටලු.

"කාර් එකක්......? හොරකම්.......?"

ඔන්න මැන්ගෙ ස්ක්‍රීන් ප්ලේ එක යනවලු දැන්.කාරනෙන් කාරනේ පැහැදිලිවේගන එනවලු දැන්.
කොහොමින් කොහොමින් හරි තව පොඩි කනේපාරවල් දෙක තුනක් ගහද්දි අපේ කොල්ල මරල‍තෝනි දීල අඩල කරල තියනව.ඔන්න ඔහොම ඔහොම කොහොම හරි සී.අයි.ඩී ලොක්කට තේරිලා තියනව මෑන් අහින්සකයි,මෙතන මොකක්ද පටලැවිල්ලක් තියනව කියල.ඉතින් අපේ එකා කියපු කතාව සී.අයි.ඩී ලොක්ක පිලි අරගෙන.ඒත් ඉතින් මු කියන කතා අයිඩෙන්ටි එක බලල විතරක් තීරනය කරන්ඩ බැරිනිසා මිනිහගෙන් අහල යාලුවෙකුගෙ දුරකතන අංකයක්.

හුටා අර 60000ක් විතර වටින ෆෝන් එක කල්ලා අරන් මාරුවුනනේ.යාලුවන්ගෙ කාගෙවත් අංකයක් මතක තියගෙන ඉදල නෑ මැන්.එතන මාර ජරමරේ ඒපාර.කොහොමහරි එලිවෙනකන් යාලුව කූරු ගැනල.අන්තිමේදි පොලීසියෙන් මිනිහගෙ ප(ර්)ස් එකේ තිබිල පොඩි තුන්ඩු කෑල්ලක ලියල තිබ්බ නොම්මරේකට කතාකරල.ඔන්න ඔහොම ලංකාවෙ අහවල් නම තියන කොල්ලෙක් පොලීසියෙ කියන ආරංචිය මෙයාගෙ යාලුවන්ට හම්බවෙනකොට පහුවෙනිද හවස්වෙලා.මෙහෙ ඉතින් යාලුවෙක් දවසකට අතුරුදහන් උනා කියල කවුරුවත් මහා ලොකුවට හොයාන්නෙ නෑ.මොකද සමහරු තමන්ගෙ පුද්ගලික අවශ්යතවයන් සඳහා තාවකලිකව අතුරුදහන්වීම සාමාන්‍ය දෙයක්(ෆෝන් එහෙමත් ඕෆ් කරල) ඒක දන්නෝ දනිති.

ඉතින් ඔය කතාව අහද්දි මම උනත් ඔයගැන ලොකුවට හිතල තිබ්බෙ නෑ.මමත් ඔය ඉදල හිටල හොර ටැක්සිවල ගිහිල්ල තියනව.හැබැයි කතාව අහැවුවට පස්සෙනම් මම හිතාගත්ත කරුනු කීපයක්

1.පයින් ගියත් හොර ටැක්සිවල නොයමි.
2.යාලුවො දෙන්නෙකුගෙවත් ෆෝන් නම්බ(ර්)ස් කටපාඩම්කර ගනිමි.
3.ෆෝන් එකනම් කාටව්ත් අරන් පල කියල දුන්නත් ගෙනියන්නෙ නැත්වෙයි.